GURIT

GEGURITAN "SEKAR WUS SUMAWUR"

Sekar wus sumawur,

sauruting lurung-lurung,

kang donga kedawung,

ngumandhang ing awang-awang,

rumesep ing gegodhongan,

ngrengani wengi sampurna,

angin tumiyup jenjem,

lan kumesar pucuk-pucuk cemara,

sekar wus sumawur,

ing dodalanan rumpil,

mbabar ing antaraning krikil,

sesandungan,

ngiringi sukma oncat raga,

sekar wus sumawur,

ing puncaking arga,

raga bakal sirna,

sukma nuju kaendahan agung,

mendhung gumantung ing lawang,

sumilak,

tan bisa munthes pengarep-arep,

ngluru pepadang jati,

sekar wus sumawur,

ing akasa lan mega-mega,

nalika sukuk tumapak,

ing korining swarga