Carita Pewayangan

DAMARWULAN NGENGER

            Raja Putri Subasiti Brakusuma jumeneng nata ing nagara Majapahit, ajejeluk Prabu Kenya Majapait, Ratu Kencana Wungu utawa Ratu Ayu ing Majapait. Warangka nata kang ngasta bang-bang pangaluming praja asesilih Patih Udara.

            Menakjingga adipati ing Blambangan kang maune kebawah Majapait mbalela, mirong kampuh jingga emoh kaprentah Majapait, malah banjur madeg ratu ana ing Blambangan, Prabu Menakjingga trus neluk-nelukake tanah bang wean bawah Majapait.

            Nyipati lelakon iku Patih Udara prihatin banget banjur tindak atinggal nagara, sumedya mratapa ing gunung nenuwun ing Dewa supaya nagara Majapait tata tentrem karta raharja sarta bisa unggul ing yuda.

            Garwane Patih Udara dititipake marang wong tuwane ing Puluhamba kang apeparab Begawan Santanu Murti. Nalika samana Nyai Patih lagi mbobot. Dene kang nggenteni dadi patih ing Majapait adhine Patih Udara dhewe aran Logender. Durung suwe ana ing Puluhamba, Nyai Patih babaran miyos kakung diparingi tetenger Raden Damarwulan. Bareng Raden  Damarwulan ngancik diwasa mothah takon bapa. Sang Begawan kamiwelasen marang wayahe, Damarwulan dingendikani yen satemene putrane Patih Udara, kang saiki lagi mati raga mratapa ana ing gunung. Sranane bisa ketemu bapa kudu wani prihatin suwita marang Patih Logender ing Majapait.

            Sanajan Patih Logender kuwi isih pamane dhewe Damarwulan diwanti-wanti aja nganti ngrumangsani suwita ing bapa pamane dianggepa suwita ing bendara. Apa saprentahe abot entheng kudu dilakoni. Klakon, Raden damarwulan mangkat menyang Majapait, digawani pusaka keris lan didherekake wulucumbune Patih   Udara loro cacahe yaiku Sabda Palon lan Naya Genggong.

            Ana ing kepatihan Raden Damarwulan banget kawelas asih, banget disiya-siya, ora mantra-mantra suwita marang pamane dhewe. Pagaweyane abot, pangane ora dipikir. Pagaweyan apa kang daadi bubuhane Raden Damarwulan? Wah iya ora patut banget. Damarwulan didadekake gamel kudu ngopeni jaran rolas. Ngerok jaran dhewe, ngresiki kestalan dhewe, lan kudu ngeritake suket dhewe. Luwih-luwih anake Patih Logender kang aran Layang Seta lan Layang Kumitir banget siyane marang Damarwulan. Untung Damarwulan, Damarwulan sanajan disiya-siya lan diwenehi pagaweyan kang ora mekakat abote, ewadene saglugut pinarasasra ora nggantes, saka anggone ngestokake dhawuhe eyange. Suwening-suwe marga saking mantepe suwitane, pangrengkuhe Kyai Patih marang Damarwulan saya mundhak becik malah banjur dipundhut mantudidhaupake karo putrane wuragil yaiku Dewi Anjasmara.

            Kocapa Prabu Kenya karo para nayaka tansah menggalih tata raharjaning praja. Banget sekel ing penggaliah, dene durung ana para bebanthenge Majapait kang bisa mrantasi gawe ngalahake Menakjingga. Saka sekele Prabu Kenya banjur munggah ing sanggar palanggatan mangsah semedi nenuwun marang Dewa supaya enggal bisa mbirat ruwet rentenge praja lan bisa nyirnakake parangmuka kang agawe retune negara.

            Sajroning semedi Prabu Kenya bisa oleh wangsit. Esuke Sang Nata nimbali Kyai Patih. Sawise Kyai Patih ngadhep Sang Prabu paring pagandika: “Siswa Patih ingsun nampi wangsit saking jawata bilih ingkang saged mbengkas karya menika lare saking dhusun namanipun Damarwulan. Praamila ndika padosi si Damarwulan menika ngantos kepanggih.” Patih Logender matur, “Dhuh Sang Prabu, ingkang nama Damarwulan menika putranipun kakang Patih Udara. Samenika sampun wonten kepatihan malah kula pendhet mantu pikantuk Anjasmara”. Sang Prabu Kenya : “ Yen mangkono, tiwas kebeneran, mara enggal iriden ing ngarsaningsun”. Patih Logender: “Nuwun inggih sendika”.